【日本犬山】Day 4 犬山城,。明治村

日期		行程	住宿
27-Mar-14	THUR	犬山城 明治村 Dinner@名古屋Zenzero	Nagoya Via Inn

朝早起身就出發返名古屋，由於買得太多野，決定先將我地的行李放係酒店，之後再出發去犬山，由於去犬山要搭名鐵，近鐵pass就用唔著了，出發前俾我發現有一隻叫犬山城下町的套票，1300yen包左來回名古屋同犬山/犬山遊園的名鐵車票, 犬山城入場劵, 同埋一d犬山的coupon (要係指定場所換啊！)，真係抵呀，所以我地都係名古屋站買左呢個套票，同埋我地回程係明治村返黎都係會係犬山站搭車，cover晒我地的需要~

犬山城 (http://www.inuyamajohb.org/)

決定黎犬山城係因為佢係賞櫻名所之一，由車站行去犬山城都需要少少時間，沿途行民居上去，突然想起留學的時光！

當見到三光稻荷神社，就代表已經黎到犬山城下，我地十分之興奮，因為見到好多櫻花，神社內外的鳥居亦謀殺左不少菲林~

黎到犬山城，雖然有個犬字，但唔代表寵物可以入內啊！看到門外的小狗真可憐，點解主人會捨得將可愛的小狗放係城外..哈哈

入到去，無想像中咁多櫻花>.<不過都幾靚，我地仲同左日本可愛的小妹妹影相~~哈哈~

入城參觀係要除鞋的，著左穿O襪就尷尬了….犬山城其實都幾窄，上上落落都要特別小心，雖然無名古屋城咁大咁多野睇，但風景卻比印象中的名古屋城靚，不過睇番相，名古城的櫻花應該更靚呢！

去完犬山城，見到好多人圍觀幾個女仔唱歌，仲有好似係電視台的人，但睇完唔識，我地就繼續賞櫻，狂影之後就出發返犬山站去明治村，沿途的河2旁有好多櫻花，真係好靚，櫻花季節黎日本真係好好！

明治村(http://www.meijimura.com/)

來往明治村主要有2種方向，一係好似我地咁係犬山站搭巴士，另一方法就係係名古屋的榮搭車去，由於榮的班次較少，同埋我地住名古屋，經考慮後，我地先買犬山PASS同埋係犬山去呢~

由於去到車站，又就快夠鐘搭車，我地好似練仙咁成日都無食過野，去到明治村即刻食個可樂餅同熱狗充饑~



明治村其實係由好多重建明治時代的建築物而成的一個旅遊地，有D似大型博物館，鍾意影相的，我都幾推薦，因為都有好多唔同特色的野影，又有教堂，又有舊式郵政局等等…係一個幾舒服的地方！

由於面積都幾大，有成一百萬平方米以上，所以裡面仲有特式火車，可以俾錢由一個園區搭去另一個園區，佢亦有導遊巴士可以搭，我見有D公公婆婆買的套票係包埋搭巴士的，果個應該係明治村的套票，唔知道係幾錢呢！因為我地慳錢的關係，全程都係行，行到對腳好似唔係自己咁！到閉館要走的時候，仲要趕巴士，攰到真係好後悔無買車票，哈哈

以下係其中一D我覺得比較有特色的地方~

教堂

幾靚，影相一流~

郵政局

呢度又懷舊，又可以買明信片寄，仲可以寫信俾10年後的自己，都真係幾好！

監獄

睇下當時的人的監獄係點都幾好~~

蓋章紀念

日本好多地方都會有的就係蓋章儲印仔，既然黎到，我當然都有周圍去”吸吸吸”啦~~~

我地係攰到死的時候搭尾班車走(其實之後太多人，開多左一架)，我地上車時，晴天霹靂咁得番一個位(@_@。仲要我地之後有一個婆婆帶住2個孫女，我地發揮左關愛的精神，忍痛讓座俾婆婆，而婆婆又讓座俾佢2個孫女坐，可能大家都好攰，好多人都唔係好想讓座，到最後有一情侶的男子讓座俾婆婆，從佢地得知婆婆都係名古屋黎，由於太攰喇，我同阿妹決定上到名鐵，我地一定要搵位坐，希望唔好再遇到婆婆…哈哈

趕番名古屋，主要係約左日本朋友仔今晚見面，而同學仔su，亦都係今日到名古屋~

好趕咁 終於返到酒店check-in，朋友仔已經黎到酒店等我地呢~

今晚去左名古屋站附近，一間叫Zenzero的日式意大利餐廳食飯，d野好好食，個pizza好特別，第一次見pizza咁整呢~

芝士火煱都好好味~太耐無見大家，update完一輪，之後就返酒店休息，為之後一日的旅程做準備~