【日本名古屋】Day 5 - 長島三井Outlet。名花之里

6月 23, 2014

日期		行程	住宿
28-Mar-14	FRI	長島三井 Outlet Park 名花之里	Nagoya Via Inn

今次中部之旅，我最期待的行程就係去名花之里，由於我地去的時間雖然已經到左賞櫻季節，但仲有冬華之競技，即係冬天夜晚的燈光show，為左配合去名花之里，打算日頭行下outlet，唔好浪費時間！我揀左去附近的長島三井 Outlet Park！

長島三井 Outlet Park (http://www.31op.com/nagashima/)

去長島outlet，有幾種方法，係名古屋站搭巴士，或者係搭JR近鐵線！

買左pass的我地，當然係搭近鐵啦，慳番程車錢…不過好奸地，pass竟然唔可以搭桑名站去outlet的巴士！我地悠閒地出發，亦悠閒地搭錯車~係車度我地掛住傾計講去名花之里，竟然係長島落左車，仲要出左閘睇地圖先發現mix up左=.=”搞到su要再買過張車票，而我地亦好白痴咁又要再等佢下班車先去，記住要去outlet的朋友如果係冬天要去桑名站轉車啊！

長島呢個outlet打破左我一向對outlet的觀感，因為實在太多野買喇！最意外係，佢好多店仲要係賣緊同出面mall賣緊的新貨，就好似lowery’s farm, earth music ecology咁，真係俾佢激死呀..因為我地第一日血拼時無諗過outlet有新貨賣，已經買左好多野，去到outlet竟然都有，仲要平左，好彩之前無買晒，我之前睇中褸，覺得有點貴，所以無買到，去到outlet竟然半價，唔需考慮，即買，哈哈！

Lunch我地去左其中一間餐廳食，佢都幾得意，有少少似food court，有好多間唔同餐廳的食物俾你選擇，但佢係你入去前就要order食物，之後先安排入座，佢地會有人serve食物去你張枱，之後想再order食物亦可，唔錯的安排~我叫左名古屋名物味噌炸豬扒飯，仲要係矢場豬的..好味！

由於日本的交通唔似香港咁方便，為免錯過d車，我地去到時已經搵定走要搭咩車，我地發現原來outlet係有一架直接去名花之里的巴士，正呀，唔需要轉黎轉去(我地再三問職員確認，職員仲拎堆佢地內部的文件俾我地睇，哈哈)，可惜我地原本打算2點幾3點就離開，但太多野行，我地不斷咁延遲走的時間，但最後未行晒就要走了！

名花の里 (http://www.nagashima-onsen.co.jp/nabana/index.html/)

去到名花之里，已經接近黃昏了，見到好多好多好靚的櫻花，我地就好後悔無早d黎，都係shopping的錯！喜歡花的朋友一定不可以錯過呢個咁多花的地方，d花真係好靚，有機會再黎，我一定會早d黎去影花，因為我地影左一陣就入黑了，雖然夜櫻都係超靚，但始終有d唔同呢！

名花之里的冬天入場劵相對較貴，但內含1000yen消費贈劵可於館內消費，真係唔錯呢！

我地掛住影花，到後來就快閉館先走去買野食同買手信，我地呢幾日都有處於練仙mode，勁夜先食左幾粒章魚燒，我地仲買左平餅，其實都唔知係咩，但見個個日本人都買，應該係正野^^

其實我地都幾擔心無車返名古屋，因為搭車的指示太唔清晰，我地明明睇time table係已經尾班車時間，但見館內仲有咁多人，冇理由咁早冇車，所以走左去問職員，佢地果然話冇咁快，去近鐵車站的尾班車係晏d，於是我地就好安心咁返去繼續影相！走的時候，其實都唔sure係咪真係有車，d日本人都話見大家都等，應該冇問題，原來大家都同我地一樣呢，果然係指示唔清楚，d time table錯 :p

有太多靚景了，即刻去片:

夜櫻真的很美～～～