【日本北海道知床旭川】- Day 6 流冰漫步。梅光軒。激安之殿堂

Day 6 知床 => 北見 => 旭川

交通:	1) 旭川去北見: 知床第一酒店免費旅館車
	2) 北見去旭川: 自駕Honda Stepwgn
住宿:	旭川ワシントンホテル

流冰慢步
今日天未光晒就要起身準備參加重頭活動: 流冰慢步
我地join左由知床自然協會搞的最早的6:30 section，一早就起身係酒店大堂等車黎接我地，
詳情可以參考website: http://www.shinra.or.jp/ryuhyo/index.html

我地架車除左我地6個香港人，仲有3個日本人，日本導師差不多全程都係講日文！
知床同網走每年的1-3月都會被鄂霍次克海被流冰包圍，所以我地先有機會玩呢個咁正的冰上活動，
去到浮冰的沿岸，導師停低車，開始派衫俾我地換，套衫係防水保暖的，
唔知係咪之前報名一定要俾定身高體重果d，所以套衫又真係幾fit喎~
我地要除晒d外套同埋鞋，但就可以照帶冷帽~
點解明明套套衫都咁colourful，得我果套成隻企鵝咁架=.=||||



一開始導師就試下個場先，一黎就跌左落水，叫我地行第邊，嚇親我地~
R san由於之前整親隻腳，同之後要再揸車，所以都怕咁行係d冰度會再整親，最後佢都係放棄左無玩到，好可惜呢>.<
開頭都驚驚地，但原來小心d，慢慢行就無問題架喇，真係好好玩呀~
到最後試埋落水都發現冇咩問題，大家就好放縱咁玩，友人們仲玩到唔捨得返埋岸添呀~



玩完流冰慢步，導師車返我地返番酒店，我地把握時間即刻浸個溫泉，再去食早餐，
真係好捨得離開知床呀，下次有機會一定要再黎呢~~

北見
坐旅館免費車去北見，展開我地第二程的自駕遊~
係北見一落車，我地就去搵野食，之前好少見到人講北見有咩食，好彩落車的北見明治安田生命ビル隔離就有個百貨公司
我地分開左去2間食，我就食左咖哩豬扒飯，好味^^

租車@Mazda北見分店
租車的Mazda就係同一條路度，行過去都係大概5分鐘，
一去度個叔叔就問我其他人識唔識日文，佢知道佢地唔識，就成日都嘗試用英文，但其實佢講全日文可能會易明d~哈哈
大叔都好好人，我地問咩都答到我地，仲叫我地有咩事可以打佢手提，仲叫我地俾埋我地手提佢，等佢知道係我地搵佢~
我地加左一千yen extra保險，加左之後即使大吉利是total loss我地都唔使賠錢~

Mazda好得意，佢唔係只租自己d車，我地今次租的係Honda的Stepwgn，
呢架亦係出發前同R San考慮的時候都覺得Stepwgn係ok，估唔到又俾我地租到，
呢度又係無得租ETC card，點解！！個GPRS感覺亦都好似冇Serena咁好用，亦食油d，
同埋對門好重，我成日都以為未unlock，wakaka~




沿途的景色好靚啊~~



無驚無險到左旭川，我地去左行街，趁未收都行左2間百貨公司~
旅遊書講的ESTA，竟然好似執左，無晒燈圍晒板..奇怪...

梅光軒
(http://baikohken.com/shop/index.html)
晚餐去左食好出名的旭川拉麵梅光軒，其實都幾好食，個人覺得較為油左少少，
聽講話好似因為北海道凍的關係，所以會加層油落去keep住個溫度~~

激安之殿堂
(http://www.donki.com/search/shop_detail.php?st_store_id=177)
太耐無去日本，竟然唔知道有呢間咁好行的激安之殿堂，全日本好多地方都有分店架！
呢間野好啱香港人，因為開到夜晚凌晨2點~
真係好多野賣呀~~~呢間分店隔離仲有間好大的超級市場，我地係先去超市買野食，買完先黎呢間慢慢行呢，仲有得免費泊車添呀~

仲有我鍾意唐老鴨的野添呀~~

行到好攰，終於返酒店，呢間酒店係成個Trip最平，每人只係2000yen咋，有免費wifi~~
仲要第朝去朝陽亭就係正酒店門口，同埋Mazda還車又係隔離~正呀~

由於用酒店名泊車係1000yen一日無限出入，最遲第朝10:30前取車，所以要先去酒店reception拎張ref紙去隔離的停車場~
不過就要放低車匙，有專人幫你泊好架車，唔知係咪見我地係外地人，所以佢係泊左係地下，
第一次取車就要俾全數，之後返黎果陣想俾番條匙佢，但係等左陣都無人，最後我地都係是但泊番係地下就算，哈哈~




小插曲
由於事前無做足準備，去激安之殿堂純粹係經過見到呢間野，Spice以為好醒，話記得點樣去，無用GPRS
點知早左一個街口轉，搞到迷路了，R san仲有少少燥底左=.=，嘗試問路之後，突然醒起其實我地可以上網搵間野的電話~
就係咁咩都解決晒，今次學會了下次即興想去的地方最好都係上網search個電話就咩都ok了:)